Gwarantiadau estynedig
Os byddwch yn prynu nwyddau fel set deledu, cwcer neu beiriant golchi, efallai y cewch chi gynnig gwarant neu warantiad estynedig - ond fe all fod rhaid ichi dalu mwy amdano.
Meddyliwch yn ofalus am y gwerth am arian sy’n cael ei gynnig gan warantiad estynedig, oherwydd mae’n debyg o fod yn ddrud o’i gymharu â’r swm y byddech chi’n ei dalu fel rheol ar waith trwsio.
Mae rhai pobl yn anghofio bod gan y nwyddau y maen nhw’n eu prynu yn newydd warant y gweithgynhyrchydd, sydd fel arfer yn para am flwyddyn, a does dim angen prynu gwarantiad estynedig wrth ichi brynu’r nwyddau felly.
Os penderfynwch y byddech chi’n hoffi cael gwarantiad, does dim rhaid ichi ei brynu yn y siop lle prynsoch chi’r nwyddau. Mae nifer o gwmnïau - gan gynnwys cwmnïau yswiriant a’r gweithgynhyrchwyr eu hunain - yn gwerthu gwarantiadau estynedig ar bob math o nwyddau cartref, o dostiwr i gyfrifiadur. Weithiau, mae’r rhain yn gallu bod yn rhatach ac yn fwy cynhwysfawr na gwarantiadau estynedig y manwerthwyr. Erbyn hyn, mae hefyd yn bosibl prynu gwarantiad sy’n cynnwys nifer o offerynnau, megis yr holl offer trydan yn eich cegin. Felly mae’n sicr yn syniad da chwilio am sawl dyfynbris cyn ichi gytuno i godi gwarantiad.
Mae’r gyfraith hefyd yn ei gwneud yn ofynnol i fanwerthwyr roi gwybodaeth benodol am warantiadau y maen nhw’n eu gwerthu, ac mae’n bosibl y bydd gennych hawl i ganslo’ch gwarantiad estynedig os dewiswch chi. Cysylltwch â Chyswllt Defnyddwyr i gael cyngor.
Gweler hefyd Mynnwch wybod eich hawliau - Gwarantiadau estynedig i gael gwybodaeth am arian yn ôl, cynghorion a chymalau eithrio.
Bu eitemau yn y wasg yn ddiweddar ynglŷn â deddfwriaeth yr UE sy’n ymddangos fel petai’n rhoi ‘gwarant am ddwy flynedd’ i brynwyr ar nwyddau.
Mae deddfwriaeth yr UE yn disgrifio gwarant gyfreithiol sy’n orfodol ledled Ewrop am o leiaf dwy flynedd. Gall defnyddio’r term ‘gwarant’ fod yn gamarweiniol oherwydd bod llawer o brynwyr yn cysylltu hyn â gwarant gwneuthurwr/manwerthwr ar nwyddau a roddir yn aml am ddim am tua blwyddyn ar ôl prynu rhai nwyddau,
Mae deddfwriaeth yr UE yn berthnasol i’r DU, ond oherwydd bod gan y DU lu o ddeddfwriaeth yn ymwneud â defnyddwyr, yn lle creu cyfreithiau newydd, cynhwyswyd y newidiadau mewn deddfwriaeth y DU sydd eisoes yn bodoli, sef y Ddeddf Gwerthiant Nwyddau fel y diwygiwyd ym 1979.
Mae llawer mwy o ddiogelwch ar gyfer defnyddwyr yn bodoli yn y DU na’r hyn a geir yn neddfwriaeth yr UE yn gyffredinol. Mae rhai o fuddion y Ddeddf Gwerthiant Nwyddau’n cynnwys cyfnod o gyfyngiad statudol o chwe blynedd yn hytrach na’r ddwy flynedd a gynigir gan yr UE, sy’n golygu eich bod chi’n gallu hawlio o fewn hyd at chwe blynedd yn y DU a Chymru a phum mlynedd yn yr Alban a gallwch chi wrthod y nwyddau a hawlio ad-daliad y pris a dalwyd o dan rai amgylchiadau penodol.
Am fwy o wybodaeth ynglŷn â’ch hawliau o dan y Ddeddf Gwerthiant Nwyddau, ewch i adran Deddf Gwerthiant Nwyddau 1979 y wefan, neu ffoniwch un o’n cynghorwyr hyfforddedig ar 08454 04 05 06.
