Ceir
Fe allech arbed arian drwy brynu’n breifat - ond mae hynny’n fwy o risg na phrynu oddi wrth ddeliwr ceir. Does dim cymaint o ddiogelwch cyfreithiol gennych, ac mae’n gallu bod yn anos sicrhau bod popeth yn ddilys.
Osgoi problemau
Dylai prynu’n breifat fod yn rhatach na phrynu oddi wrth ddeliwr. Ond mae’n fwy o risg hefyd: gallai’r car fod wedi’i ddwyn, neu efallai ei fod wedi’i ddefnyddio yn warant ar gyfer benthyciad neu gytundeb llogi, a’i fod yn perthyn mewn gwirionedd i gwmni cyllid. Mae bob amser yn syniad da cwblhau gwiriad HPI ar gar ac fe allai hwnnw ddangos unrhyw geisiadau cyllid neu geisiadau yswiriant sydd wedi’u gwneud ar y cerbyd yn y gorffennol ac sydd heb eu datrys.
Mae gennych lai o hawliau cyfreithiol os ydych yn prynu’n breifat. Rhaid i’r car gyd-fynd â’r disgrifiad, ond dydy’r rheolau eraill ddim yn gymwys. Os bydd gwerthwr preifat yn dweud celwydd am gyflwr y car, gallwch ddwyn achos i geisio adennill eich colledion - os gallwch ddod o hyd i’r gwerthwr.
Mae rhai delwyr yn cymryd arnyn nhw eu bod yn gwerthu’n breifat er mwyn osgoi eu cyfrifoldebau cyfreithiol ac i geisio cael gwared ar geir sydd â nam neu geir sydd â phris rhy ddrud arnyn nhw. Maen nhw’n hysbysebu mewn papurau lleol a ffenestri siopau. Mae’r arwyddion rhybuddio i chwilio amdanyn nhw yn cynnwys:
-
Hysbysebion sy’n rhoi rhif ffôn symudol neu sy’n dweud pryd yn union i ffonio (fe allai fod yn gaban ffonio cyhoeddus, nid cartref y gwerthwr).
-
Bod yr un rhif ffôn i’w weld ar sawl hysbyseb.
-
Pan fyddwch yn ffonio i ofyn am y car, fod y gwerthwr yn gofyn “Pa un?”
-
Bod y gwerthwr am ddod â’r car atoch chi, neu gwrdd â chi rywle, yn hytrach na’ch bod chi’n mynd i gartref y gwerthwr.
-
Os yw’n ymddangos bod llawer o geir ar werth yn y stryd ar ôl ichi gyrraedd cartref y gwerthwr.
-
Os yw’r gwerthwr yn ddeliwr mewn gwirionedd, yna bydd eich hawliau cyfreithiol llawn yn gymwys.
