Prynu gartref
Dychwelyd neu ganslo archebion
Os ydych chi wedi archebu eitem o’ch cartref, gallwch ganslo’ch archeb a chael ad-daliad o dan y rhan fwyaf o amgylchiadau. Darllenwch ragor i gael gweld sut.
- Pan fydd eich archeb yn cyrraedd
- Pryd i ganslo
- Sut i ganslo
- Ad-daliadau ar ôl canslo
- Pryd na chewch chi ganslo
Pan fydd eich archeb yn cyrraedd
Mae gennych chi hawl i ddychwelyd eich archeb neu i’w chanslo am unrhyw reswm. Ond mae rhai eithriadau.
Os nad ydych yn hoffi’r nwyddau neu os ydych chi wedi newid eich meddwl, cewch ganslo’r archeb. Fel arfer, mae hyn o fewn y cyfnod ‘ail-feddwl’ o saith diwrnod. (Sylwch ei bod yn bosibl bod y rheolau ar gyfer gwasanaethau ariannol (gan gynnwys credyd defnyddwyr) yn caniatáu cyfnod gwahanol ar gyfer tynnu'n ôl.)
Cewch ganslo ar unrhyw adeg hyd at:
- ddiwedd y seithfed diwrnod gwaith ar ôl y diwrnod y cewch chi’ch nwyddau; neu
- ddiwedd y seithfed diwrnod gwaith ar ôl y diwrnod y cytunodd y masnachwr fynd ymlaen â’r gwasanaeth.
Ond sylwch y gallech golli’ch hawl i ganslo ar ôl i’r gwasanaeth ddechrau.
Mae gennych chi dri mis arall i ganslo os na chawsoch chi’r holl wybodaeth ysgrifenedig angenrheidiol. Os bydd y masnachwr yn rhoi’r wybodaeth yma ichi’n hwyr - ond cyn diwedd y cyfnod o dri mis - bydd gennych chi hyd at saith diwrnod i ganslo o’r diwrnod y cewch chi’r wybodaeth.
I ganslo’ch archeb, rhaid ichi ddweud wrth y gwerthwr mewn ysgrifen - drwy lythyr, ffacs neu e-bost. Os byddwch yn anfon llythyr, anfonwch y llythyr drwy’r post cofrestredig, er mwyn profi eich bod wedi’i anfon ac olrhain sut mae’n mynd yn ei flaen.
Os ydych chi wedi talu am y nwyddau neu’r gwasanaethau yn barod, rhaid i’r gwerthwr ad-dalu’ch arian cyn pen 30 diwrnod ar ôl ichi ganslo’r cytundeb.
Os ydych wedi talu am y nwyddau drwy gyfrwng cytundeb credyd a gafodd ei awgrymu neu ei drefnu gan y gwerthwr, bydd y cytundeb yn cael ei ganslo’n awtomatig.
Sylwch fod yna amgylchiadau pan na chewch chi ganslo oni bai bod y masnachwr wedi rhoi hawl benodol ichi i wneud hynny, sef:
Os yw’r masnachwr eisoes wedi dechrau darparu’r gwasanaeth o fewn y cyfnod canslo a’ch bod chi wedi cytuno â hynny. Mae’n rhaid eich bod wedi cael gwybod mewn ysgrifen - cyn i’r cyflenwr gytuno i gyflawni’r gwasanaeth - y byddech chi’n colli’ch hawl i ganslo wedyn.
- Os cawsoch chi wneud y nwyddau yn unol â’ch manyleb chi neu eu personoleiddio.
- Os yw’r eitemau’n debyg o bydru neu ddirywio’n gyflym, fel blodau neu fwydydd ffres.
- Os na all y nwyddau gael eu dychwelyd oherwydd eu natur.
- Os ydych chi wedi agor meddalwedd, CDs, DVDs etc oedd o dan sêl.
- Os mai papurau newydd, cyfnodolion neu gylchgronau yw’r nwyddau.
- Os prynsoch chi wasanaethau betio, gamblo neu loteri.
- Os yw’r pris yn dibynnu ar amrywiadau yn y farchnad ariannol.
- Os yw’r nwyddau wedi’u personoleiddio’n amlwg.
