Newid Cyflenwr a Symud Tŷ
Cod gwirfoddol yw’r Siarter Trosglwyddiad Anghywir i Gwsmeriaid, neu’r Erroneous Transfer Customer Charter, sy’n ceisio diogelu cwsmeriaid sy’n cael eu trosglwyddo at gyflenwr newydd drwy gamgymeriad.
Mae’r Siarter Trosglwyddiad Anghywir i Gwsmeriaid yn gosod allan y lefel isaf o wasanaeth y dylai cwsmer ei ddisgwyl yn dilyn trosglwyddiad anghywir.
Mae trosglwyddiad anghywir yn digwydd pan gaiff cwsmeriaid eu trosglwyddo i gyflenwr heb fod unrhyw gontract dilys yn newid ei le.
Er mwyn osgoi unrhyw amheuaeth, fe fydd y Siarter Trosglwyddiad Anghywir i Gwsmeriaid ond yn berthnasol mewn achos o drosglwyddiad anghywir ac nid er enghraifft pan fydd cwsmer yn newid ei feddwl ar ôl newid cyflenwr.
Dyma fanylion y Siarter Trosglwyddiad Anghywir i Gwsmeriaid:
• Os yw cwsmeriaid yn tybio eu bod wedi eu trosglwyddo’n anghywir, gallant gysylltu â’r hen gyflenwr neu’r cyflenwr newydd.
• Bydd y cyflenwr y cysylltwyd ag ef yn cysylltu â’r cyflenwr arall i ddatrys y mater.
• Dylai cynrychiolydd, sydd wedi ei hyfforddi’n briodol, o’r cyflenwr y cysylltwyd ag ef esbonio’r canlynol i’r cwsmer:
1. Pa gamau fydd yn cael eu gweithredu.
2. Pryd y gallant ddisgwyl yn rhesymol i’w cyflenwad gael ei drosglwyddo yn ôl i’r cyflenwr gwreiddiol.
3. Y byddant yn talu ond unwaith am yr ynni a ddefnyddiwyd a lle bo’n bosibl sut y bydd eu trefniadau bilio’n cael eu trefnu.
4. Sut y byddant yn cael gwybod am gynnydd i ddatrys y sefyllfa.
5. Ar gais, sut mae cwynion yn cael eu datrys a, lle bo’n briodol, sut y byddant yn trin hawliadau am iawndal.
• Bydd y cyflenwr y cysylltwyd ag ef yn anfon cadarnhad mewn llythyr am y manylion a roddwyd ymhen 5 diwrnod gwaith i’r cyswllt gan y cwsmer.
• Ble bynnag fo’n bosibl, bydd y cyflenwr yn esbonio pam ddigwyddodd y trosglwyddiad anghywir.
• Bydd y cwsmer yn derbyn cadarnhad ymhen 20 diwrnod gwaith o’u cyswllt cyntaf y byddant yn dychwelyd at eu hen gyflenwr.
